夏之實況 Gadget全裸下水
o靚模影水着寫真，拎雪糕同奶就俾人插，話教壞細路，咁拎手機、DC等gadget應該唔會有人心邪啩？
家好多人無論身處海灘、泳池定浴室，喺水上定水底，都想繼續用住gadget，1分鐘都唔可以停，於是愈嚟愈多廠商想食呢條水，爭住出防水機。 唔只潛水DC多咗，連手機都開始玩潛水，加埋大堆副廠出潛水配件，務求要將所有gadget都變成滴水不侵，今期Ketchup 第 115 期 就為大家檢閱呢場夏水禮。
日系手機在港功能
上網 Ｘ
SMS Ｏ
MMS Ｘ
影相 Ｏ
播歌/片 Ｏ
介面 日/英
顯示及輸入漢字 80%
超爆！水中SMS響電話 DoCoMo F-08A
有相為證，冇打假波，手機唔戴套 都可以浸落水！Fujitsu新出嘅DoCoMo F-08A，擁有目前手機最高嘅防水能力，可以喺常溫嘅1.5米水深下，正常操作長達30分鐘！我哋試過將佢浸晒落水，唔單只仍收到訊號，而且人哋打電話 嚟竟然照樣識響，帶住去游水絕對冇問題！只係喺水底唔可以開口講電話啫，但都可以「咕嚕咕嚕」咁應人，畀人知你游緊水，都咪話唔爆！電話都聽到，收發 SMS當然冇問題，從此send慣追魂短訊嘅lover就唔會一水隔天涯。
Spec.
防水級數：IPX5/7/8
屏幕：3" 26萬色TFT
鏡頭：520萬像素
記憶：microSDHC
體積：109×50×15.4mm
重量：120g
顏色：粉紅、黑、白、紫
售價：$3,980
水底能影 出水美顏
相對水中打電話，水底攝影對F-08A簡直係easy job！雖然佢個鏡頭只得520萬像素，唔夠update，但勝在有齊人面對焦、一笑即拍、場景模式等功能。最正係有埋美顏模式，識得自動幫人執靚皮膚同 整假大眼，潮女去游水唔戴得大眼con，用F-08A依然影得靚靚。
防水實測 浸半個鐘電冇濕
喺泳池斷續將F-08A浸落水，玩足30分鐘，部機仍然好正常，上水後打開電池蓋，雖然摸到啲水氣，但嚿電都冇乜濕到，幾安全。
日系興潛水
雖然Nokia同Sony Ericsson都出過三防手機，但防水能力唔算強，通常都係防水濺，款式亦唔多。所以最鍾意玩潛水嘅始終係日系手機，尤其係SoftBank出嘅Sharp同Toshiba機，呢年內就hit咗2部！
8MP靚影 935SH
Spec.：IPX5/7防水．3" 1,670萬色TFT屏幕．800萬像素鏡頭．microSDHC．108×50×15.4mm．131g
顏色：粉紅、黑、淺藍、淺啡
售價：$3,880
外形較男性化嘅防水手機，同女性化嘅F-08A襯番一對，最勁係有update嘅800萬像素鏡頭，男友幫女友影相就更加靚啦！
得意卡通 DM003SH
Spec.：IPX5/7防水．2.8" 26萬色TFT屏幕．320萬像素鏡頭．microSDHC．105×50×18.1mm．124g
顏色：粉紅、黑、白
售價：$3,980
迪士尼合作出嘅最cute防水手機，機面嘅星星、心心同圓圈圖案已經靚過人，機入面仲預載咗米奇老鼠、史迪仔、怪誕城之夜等10款卡通wallpaper，童心未泯嘅女仔必buy！
落水tips：防水級數點分？
IPX 級數係國際防水嘅標準，一般防水gadget至少會達到IPX5，即係防到水濺。達到埋IPX7嘅機，就能夠喺1米水深下操作30分鐘；而達到最高級嘅 IPX8，更可以喺1至10米水底下操作超過30分鐘，但就唔代表部部機都潛到10米，要留意番部機嘅spec.，好似F-08A就只潛到1.5米。
查詢：豆腐之攜帶（5166 7286/旺角先達廣場1樓F110鋪）
人機合一 潛水DC snap
嚟到夏天，最想梗係出海玩吓，感受陽光與海灘之餘，順手show吓自己嘅完美body影靚相。自己body就要靠努力keep fit，但要show靚DC，同拍埋水底下嘅美態，就要換部至新防水機，做到人機合一就最靚。
美形夏日 Fujifilm FinePix Z33WP
傳 統防水DC顏色唔靚兼且大大部，真係未必有女仔願意拎出去用。不過一向都主攻女性市場嘅Fujifilm就夠晒細心，推出新機Z33WP不單用上日系 outlook顏色夠sharp又細部，機身厚度更只得20.6mm夠晒纖薄。女士們拎佢去沙灘玩，襯埋套比堅尼，一定個個索到變o靚模！
Spec.
防水級數：IPX 5/7/8
屏幕︰2.7"
像素︰1,000萬有效像素
變焦︰3倍光學變焦
記憶︰SD/SDHC
體積︰92×60×20.6mm
重量︰110g
售價︰$1,980
查詢︰富士（2406 3225）
水底認人快
除咗擁有驕人身段之外，具備3米防水性能嘅Z33WP嘅對焦速 度亦唔錯，而且人面對焦落到水底後反應夠快，最多可同時偵測4張不同面孔，1秒就搞掂，就算影水底大合照都冇問題！另外，機背嘅2.7吋屏幕雖然只得23 萬像素，不過落水睇相都算幾清，而且仲比同類機冇咁反光添，可以即影即睇，影得唔靚都可以即時補飛。值得一提係呢部機冇防手震功能，落到水就唔好太大動作 喇！
水底樂園 Olympus Tough 6010
前排正式登場嘅Tough系新機6010，繼續玩全天候，3米防水、1.5米防跌撞同埋攝氏零下10度防凍，不過三防之餘仲有美顏模式，剛柔並重。加埋有強化色調、廣角、針孔同埋素描呢4種魔術濾鏡，轉個模式就可以自動喺影相時加入特殊效果，唔落水都一樣好玩。
Spec.
IPX 5/7/8防水．2.7"屏幕．1,200萬像素鏡頭．3倍光學變焦．xD．95.3×63.4×22.4mm．150g
售價︰$2,580
查詢︰Olympus（2376 2150）
專業之選 Pentax K7
如果你係攝影發燒友，可能會嫌普 通DC仔質素唔夠好，想影靚啲，可以考慮Pentax嘅全天候單反K7。佢除咗有攝氏零下10度嘅耐凍能力外，仲可以防塵防水滴，就算喺海邊玩，被水整濕 都唔驚，加上佢能夠拍埋720p高清片，仲未夠喉可以配埋專用潛水殼自家製作高清魚樂無窮。
Spec.
IPX 5防水．3"屏幕．1,460萬像素．SD/SDHC．130.5×96.5×72.5mm．750g
售價︰$9,990（連kit鏡）
查詢︰捷成（2926 2300）
落水tips：必check電池蓋
大家嫌長氣都冇辦法，皆因講100次都 仲係有人用防水機搞到入水，唔係因為部機冇料到！係大家忽略咗檢查電池蓋嘅重要性，事關大家入咭入電時，好多時都冇睇清楚電池蓋有冇攝到頭髮或沙石，而令 到電池蓋有虛位入水，所以大家落水前記得check好，咁就可以玩得安心！仲有影完相記得用淡水浸機15分鐘，咁先可以keep靚部機。
加殼戴套 掟晒啲gadget落水
長情嘅你可能唔想成日換gadget，亦唔會專為夏日落水而買部潛水手機同DC，想用番有感情嘅舊機，又或者你中gadget毒中到乜機都想喺水中用，其實都可以加個防水殼或套就得。近排出咗好多副廠產品，百幾至幾百就有交易，唔會好似原廠殼咁揦脷！
咭片DC百搭 SeaShell防水殼
原廠DC防水殼雖然一定最fit部機，但蝕底在只可用落單一型號，其他款式唔用得。所以最近SeaShell出咗一款可潛到40米深嘅萬用殼，適合絕大部分細size咭片機，一個人落水影完，又可以借畀friend用，大家共用一個殼，慳番唔少！
售價：$880
查詢：西雅（2717 7111）
試相 防水實測 完全冇水氣
呢個防水殼嘅邊位造得好密實，我連機帶殼掟落泳池連續影足1個鐘，開番個殼後，部DC一啲水氣都冇，信得過！
咭片機戴住個殼喺水底影相，影出嚟完全唔覺隔咗層膠，冇反光冇折射，唔錯。
落水tips
放DC入殼之後，一定要揀番啱尺寸嘅膠塞（跟殼有送）去頂實部機，再將殼外嘅開關同快門接駁掣，對準DC機頂兩個掣就得。注意，若部機嘅開關唔喺機頂，落水後就冇得熄機。
殼背冇接駁掣，好多DC功能都難免用唔番，建議落水前先揀用P mode，再關掉閃燈同校高感光度到ISO 800，咁就可以喺大部分環境下都影到清晰嘅相。
試相 防水實測 細套較易濕
將 上述5件gadgets包住套浸水15分鐘後，套入面嘅乾爽程度全部都合格，不過PSP同iPhone兩個套由於比較細，小水滴入咗去之後，比DSLR嗰 類大套較易黐上部機，所以機面有啲啲濕咗。始終呢款套都唔係100%密實，唔太建議大家將佢哋長時間浸喺水，但喺沙灘玩就夠晒用。
建議大家盡量將DC鏡頭貼住膠套去影，咁樣影出嚟嘅影像就唔覺有層膠隔住，亦較少機會影到水氣。
落水tips
擺部機入套時，最好順手擠壓出袋內空氣，個袋愈貼部機，防水能力就愈高。
套口嘅密實袋封口一定要好小心逐mm咁封實，再大力摺埋個套口，然後用上面嘅魔術貼貼實，咁就冇咁易入水。
平變防水 DiCAPac防水套
除咗影snap，家啲人用少陣手機煲粥或上網都唔得，打少陣PSP又會叫悶，但喺海灘曬太陽或者遊船河，又怕會入水入沙整壞部機，其實呢個憂慮好易掃除，只要套個防水套就掂。
呢排熱賣緊一款叫做DiCAPac嘅套，最平只係$200一個，夠晒平！而且款式夠多，細至DC仔，大至DSLR都有啱用size，連 iPhone、手機、DV、PSP都套有，真係乜機都唔怕入水，更能夠喺水底㩒埋掣。個套仲可以抵受10米水壓，只要唔浸太耐，將啲機連套掟落水都冇問 題！
拍片DV套
E想拍水底奇觀片嘅話，有啲人會嫌DC拍得唔夠清，想用輕巧型高清DV拍。最慘係DV嘅防水殼勁難搵，防水套差唔多係唯一解決方案。
售價：$650
實用Prosumer套
原廠Prosumer DC殼平極都過$3,000，而防水套只係佢嘅1/6價錢，用佢套住Canon G10等半專機落水影相，實靚過咭片機，夠實用。
售價：$490
極罕DSLR套
DSLR嘅原廠防水殼，郁啲都過萬，但DSLR防水套竟然$1,000唔使，用1/10價錢就影到水底專業相。
售價：$980
潮爆iPhone套
iPhone本身都夠潮，落水用就更加潮，最正係佢個套仲附送埋防水耳筒，經套身極細嘅窿插入部機度，可以游住水聽歌，勁爽！只係multi-touch用唔番！
售價：$200
喪玩PSP套
總有啲PSP迷玩《高達》game玩到停唔到手，喺水中心都要同人對打，遇上呢類機迷除咗防水套，都冇嘢幫到佢哋喇！
售價：$200
查詢：DC Plus（2361 7228）
訂購網址：http://www.dicapac.com.hk
機身按鈕用咗無gap設計，減低入水嘅風險。
機面有心心LED燈，開合手機或有來電時都會閃，冧女！
試相美顏後
一開美顏模式，塊面真係滑到好似公仔咁，對眼亦大咗少少，幾自然，唔誇張！
試相美顏前
為咗畀大家睇清楚啲，測試美顏模式最好喺水上進行，未開呢個功能前，對眼係正常size，塊面都有少少細紋。
試相水中影
水底影嘅相都好細緻，逐個水泡睇得到，光暗及色溫都算處理得唔錯。
安完電池蓋，記緊啪埋個lock掣先好落水。
電池上先加塊金屬蓋，用嚟填密電池同機蓋空隙，減少入水機會。
只得一個「水中」場景模式，落水用唔多夠，想玩近攝影魚仔同珊瑚就要自己轉。
Z33WP嘅大細同一張八達通差唔多，而且只得110g，掛頸都好輕盈。
雖然有防塵設計，不過潛望式鏡頭就冇蓋保護，拎去沙灘玩要小心整花。
機身掣位唔多夠簡潔，而且機背右邊嘅功能掣落到水都一樣好按，唔會㩒極冇反應。
試過拎落水玩咗15分鐘，機身全部邊位都冇入水，皆因接口有晒O-ring保護，大家可以放心玩！
試相
水底認人一樣1秒就搞掂，不過唔夠光時就會比較多雜訊。
試相
人面對焦好準，而且用埋場景自動識別功能之後，就算背光都唔會有黑面，靚晒！
試相
喺水底開美顏之後，面色變得紅潤自然，而且唔會改變泳池嘅顏色。
就算閂實電池蓋，上水開蓋前都要記得先抹乾機身，以免有水倒流入機內！
