魔術潛艇 Olympus μTough 6010

魔術潛艇　Olympus μTough 6010

連續幾個星期都喺週末打風落雨，搞到竟然有人上facebook開「反大自然逢星期六日唔係落雨就打風」群組！難得呢幾日終於見番太陽，可 以出去玩吓之餘，更要把握機會影多張靚相，咁先不枉'09暑假！而出開防水DC嘅Olympus亦趁呢個機會加推新機μTough 6010，既可潛落3米水深影相，更具備防凍同防撞功能。拎住呢部DC三項鐵人，出去玩戶外活動，一部機就夠上山下海影靚相。

Spec.
像素︰1,200萬有效像素
變焦︰3倍光學
屏幕︰2.7"
記憶︰xD
體積︰95.3×63.4×22.4mm
重量︰150g
售價︰$2,590
查詢︰Olympus（2376 2150）

深潛DC
Tough全天候數碼相機系列由03年推出至今，每代都有新功能加入，最新一代6010除咗防水、防撞同防凍外，更將3防能力升級。最大賣點係呢部1,200萬像素新機，突破至10呎防水功能，比起一般防水DC得1.5米，已夠你玩齊香港各大潛水熱點影珊瑚！

防撞防凍
深 潛之外，6010仲有防撞功能，足夠抵受從1.5米高度跌落嚟嘅衝力，而我哋實試將部機掉落地，發覺只係機身花咗少少，但就完全冇凹兼操作正常，夠晒堅 固，最啱大頭蝦同玩野外活動時用。至於防凍功能就足夠喺攝氏零下10度嘅環境下照常操作，冬天帶去北海道影雪景都冇問題。

魔術濾鏡變漫畫
呢 期Olympus大熱嘅EP-1潮玩魔術濾鏡功能，6010都一樣有得玩。佢加入TruePic III影像處理器後，除咗有「強化色調」、「針孔相機」同「廣角效果」外，仲有勁好玩嘅「素描效果」，能直接將影像線條勾劃出嚟，變成黑白漫畫效果，影完 嘅相勁有藝術味，必玩！

試相
強化色調
拍攝植物時可多用強化色調，能有效將紅、藍、綠嘅色彩加強，令顏色更加鮮艷，成張相sharp晒！

素描效果
筆者玩完素描效果，發現影線條比較多嘅畫面最能突出效果，酒樽上嘅字同浮雕即時現晒出嚟，玩effect都唔使靠電腦。

總評：拍唔到高清
今次6010嘅相片質素非常出色，冇因為3防功能，而犧牲拍攝質素。貪心係新機未能拍到高清片，更只得640×480像素真係令人有少少失望！好在新加嘅濾鏡功能夠晒好玩，令實用DC增添唔少玩味，平時影snapshot都好玩。

一心以為EP-1之後，其他OM嘅DC都會對應SD咭，點知6010又用番xD咭，支援性唔夠強。

試相
6010嘅場景模式好好用，試「水中近拍」拍攝冇乜變形，而且白平衡同對比度非常準確，都算簡單易用。

Tough獨有嘅輕敲式操控，方便喺潛水時戴住手套都用到，唔怕篤唔到十字掣。

機背2.7吋大芒睇相夠舒服，而且唔易反光。

潛望式鏡頭有保護蓋，一熄機就會自動閂埋，唔怕入水入沙，整花鏡頭。

雖然有1.5米防跌撞能力，但記住防撞唔等如防花，最好都係幫個芒貼塊保護貼。

素描後

素描前